الأحد، 25 سبتمبر 2011

دنـيـتين




بما ان الخريف بيدخل اهو .. و بما ان الاجواء بدات تبقى هادية , فكالعادة من غير مقدمة :

كأنى عايشه فى دنيتين ..
الاولى : مكانها جوايا , و اللى عايشين فيها تلاته .. انا و عقلى و قلبى , و احنا التلاته مختلفين .. مش بنتفق غير فى ان التلاته أنا .. وحاجات تانيه بسيطة و لما دا بيحصل بنتصالح .. و بنبقى سمن على عسل .. لكن غير كدا  احداث الدنيا دى مش بتخلص ... خيال عقلى و احساس قلبى مخلينى عايشه فى دنيا مليانة احداث , مرة عقلى يجى يشتكيلى من قلبى عشان حساس , و مرة قلبى يتخنق من عقلى عشان شغال , و مرة تالته قلبى زعلان من نفسه عشان بيحس , و ينتهز عقلى الفرصة و يلوم و يجرح فيا , و لما اصالحهم على بعض بحس انى تعبت ..
وساعات تانيه أنا اتدخل و اسكت قلبى و عقلى و أعيش اللحظه , بكتاب لذيذ يفتحلى افق جديدة و يخلينى اشوفها .. بموسيقى هادية تملانى أمل .. بكوبايه شاى عادية تخلينى احس ان فيها مسحوق سحرى خلانى كويسة , بانى اقف فى البلكونة و ادور على غاز السعادة , بانى اقعد مع صديقتى الصدوقة فى مكان على البحر بنحبه ,  بحاجات صغيره كلها جنان .. بس فى الاخر أنا ..

و التانية : دنيا الواقع , والظروف و الناس و الزحمة و السياسة و المشاكل و الغفلة و التناقض , الدنيا اللى كل ما تحس انك عرفت ديتها , تحدفك بأكبر طوبه و تقولك " أنت مغفل , انا مابتفهِمش , وماتحولش تفهمنى .. أنا بتعاش بس , عيِشنى  " و اللى عايشين فيها اى حد غيرك , انت واقف فى النص و دايرة حوليك ناس قريبة ناس بعيده و ناس برا اصلا , ناس بتحبك و تحبها و ناس بتحبك و تجرحك و ناس مابتحبكش وبردو بتجرحك , ناس بتفهم ناس مكلكعه ناس بسيطه , ناس فيهم الانسانية كبيرة و ناس الانسانية ملهاش معنى فى قاموسهم ,

بس فى الاخر .. و ايه يعنى !؟
ايه يعنى تتصدملك فى كام شخص عرفته ولا حتى فى كل الناس اللى عرفتها ؟ اهم حاجه متتصدمش فـ نفسك
ايه يعنى تحس انك محبط , مش هتفضل محبط على طول , اهم حاجه ماتستسلمش ..
ايه يعنى تبقى لوحدك ؟ مش هتفضل على طول لوحدك , هيبقالك صاحب او حبيب , اهم حاجه لما تلاقيهم ماتحسش انك لوحدك
ايه يعنى المشاكل ؟ هو الدنيا ليه طعم غير بيها ؟ اهم حاجه لما يجيلك فرصة تبص لمشاكلك من بعيد ماتتاخرش عشان لما هتشوفها من بعيد هتعرف قد ايه هى صغيرة ..


بس 

الخميس، 15 سبتمبر 2011

عناوين الناس ..



دايما عندى مشكلة مع البدايات .. فكالعادة من غير مقدمة

كنت اعدة على البحر قريب .. ساكـته وبتفرج على الناس .. ناس ماشيه و ناس اعدة , ناس بتضحك ناس ساكته , ولاقيت نفسى بركز اوى مع وشوش الناس .. عناوين الناس  .. عناوين الناس هى وشوشهم .. من وش اى حد تقدر تعرف حاجات كتير اوووى .. او حاجات مش كتير , او على الاقل هتحس حاجه صح , او حتى غلط .. بس الاكيد ان وشوش الناس فيها كلام كتير اوى , زى ما فيها احاسيس لا حصر لها ...


* انك تبص فى وش راجل كبير , راجل عجوز .. فتحس باطمنان تحس بامان .. ولما يحكى عن زمان .. تحس انك عايز تعرف كمان .. تسأل قد ما تسأل , لا تمل انت من السؤال , ولا يمل هو من الجواب ,  وبردو مهما عرفت من اجابات بتلاقى نفسك مش راضى بيها  , وماتقتنعش الـ لما توصل انت ليها , هى كدا الدنيا , مش بس  تعلمك , لازم تعلم فيك .. قد ايه فى وشوشهم حاجه غربية جميلة , قد اية الراحة الـ ممكن تحسها من ابتسامة يبتسمها .. او نصيحها ينصحها .. :) ,  

* انك تبص فى وش طفل لسه مولود .. لسه بقاله يوم ..لسه الدنيا ماطلتهوش .. لسه وش جميل وش بشوش .. صفحة جديدة صفحة بيضا , كومة أمل ,  البراءة ذاتها , ملاك , طفل , تأمله لازم يغير حاجة جوا اوووى جوانا .. :)

* انك تبص فى وش مامتك , لو هيبقى للـ حنان رمز فى حياتك فهتبقى هى , و لو هيبقى لتضحية رمز فى حياتك فهتبقى هى بردو , لما ماما بتيدنى حاجة بتاعتها هى بتحبها و انا صغيرة ماكنتش باخد بالى انها حاجه كبيرة , بس لما كبرت , و بلاقى ماما لسه بتيدنى حاجة بتاعتها هى بتحبها , بحس بحاجة كبيرة اوى ماتتوصفش , غير انى بتمنى ابقى ام جميلة زيهـا .. لما بتضحك سواء ان كان ليا او عليا , بحس بحلاوة الدنيا .. بحبها انا :)

* انك تبص فى وش صاحب ليك .. فيفهمك , يحسك , يضحكك , يبكيلك لو لزم الامر .. يدعيلك , يقف جامبك , يبقى دايما معاك , فتطمن انك مش لوحدك , ان فى حد لسه فاهمك , فضحككوا سوا يبقى اجمل  و اعمق ضحكة ممكن تضحكها .. انا بحب ابص لوشوش اصحابى , و لما بيضحكوا بحس انى عايزة اضحك عشان بحب ضحكتهم .. :)

* انك تبص فـ وش حد فـ صورة , او تشوفه كام مرة وبعد كدا تشاء الاقدار انك ماتشوفوش , فتشدك حاجه فى ملامحه , تحس براحة ناحيته , يلهمك فيعرفك حاجه جديدة جواك انت ماكنتش عارفها .. تحس حاجات كلـها حلوة , حاجات بسيطة ملهاش تعريف , مفيش كلام يوصفها , بس حاجات حلوة كلها .. :)

* أخـر وش .. وش لسه ماشوفتهوش , لسه معرفهوش .. بس بحبه من قبل ما أشـوفه , بحب ملامحه , بحبه كله على بعضه .. ياريت تنجز و تيجى , انا بحب أضحك اه , بس اكيد ضحكتى بيك هتبقى مختلفه .. :)

بس